من روائع البدر

[فرحة قلب]

(( الوادي ))


وين يدفن الجبل اسراره
وين يترك السيل اثاره ..
وين يختار المسافر ..
بين الشجر ظله .. وبين الحطب ناره ..
وين يبكي القمري ..
ويشره على خله ..
قلبٍ غدى كله ..
مثل البطاحي شوك ..
لو مت انا صادي ..
حطوا القبر في الجال ..
وادي الهوى لاسال ..
يمرني سيله ..
واسقي عظامي منه
وينبت في غصن الطلح ..
قلبي ورق أخضر




(( الكلام الغريب ))

من علم لسانى
الكلام الغريب . .
إلين قلت : ان الحليب . . رمل . . والمرضعه ريـح
والصدر خيمة راعى في الجدب
من علم الكذب لسانى
الرسم . . الاغانى
الطفل في الظلما
الحـلوى في الدكان
أو خيزران . . معلم معتوه
من علم المشدوه . . بألوان العيون
هذا الجنون . . الجنون
من علمنى الحب غير الناس . .
والكره غير الناس . .
من كدس الإحساس . . في اجفانى
وخلانى احلم . . احلم
وانا من سنين . . انسانى
وامحى مكاتيبى
شوهت وجهى . . كثر ما حكيت . . ألواني
وعلى الزمان الثانى
رسمتنى . . مثل ما بغانى . .
لكن على لسانى . . بقى كل الكلام الغريب
أنا الغريب
وكل شاعر في الناس غريب
وفي الارض كهف . . من نيزكٍ مجهول
لكن يعرف يقول . . يقول
كل الكلام الصعب
الحليب رمل
والمرضعه ريح
والصدر خيمة راعي في الجدب




((القاع والمسافة))
انا احبك مابها زيف وخداع
رغم الذي نخفيه .. واللي نخافه
أودعك .. ليت الألم لحظة اوداع
إلى مضت .. ننسى الألم والحسافه
وأفارقك.. لوالسفر .. يم وشراع
وبعد الفراق .. اللي نوده نعافه
لا صار مافي البعد راحه لملتاع
بالله وش نفع التعب والكلافه
من الجفا والصد .. يكفيني اذراع
لا جف نهر الحبماتت اضفافه
املي يدك رمل وترى هذي القاع
ومدي النظر .. تدرين وش هي المسا




المسافر

لا تلوح للمسافر ..
المسافر راح ..
ولا تنادي للمسافر
المسافر راح ..
يا ضياع أصواتنا .. في المدى والريح
القطار وفاتنا ..
والمسافر راح ..

يالله يا قلبي تعبنا من الوقوف ..
ما بقى بالليل نجمة ولا طيوف ..
ذبلت أنوار الشوارع .. وإنطفى ضيّ الحروف
يالله يا قلبي سرينا .. ضاقت الدنيا علينا
القطار وفاتنا ..
والمسافر راح ..

مادري باكر هالمدينة وشتكون ..
النهار والورد الأصفر والغصون ..
هذا وجهك يالمسافر لما كانت لي عيون ..
وينها عيوني حبيبي ..
سافرت مثلك حبيبي ..
القطار وفاتنا ..
والمسافر راح ..



((الماضي الحاضر ))
صوتٍ شبيه الريح .. مشققٍ بأعواد شيح
مرتّق بالدم .. معتّق بالهم زافر
صوتٍ مثل خضر العروق اللي على ظهر الكفوف المبطيه نافر
صوتٍ ذبيح .. يصرخ يصيح .. إبلك خذوه القوم
بين الفزع والنوم ..
أسرجت مهري ألف ..
وسلّيت سيفي ألف ..
وظهرت تحت الشلف ..
ماكان في الشارع غير الرصيف والفجر ..
وبواب جيراني من هالمدى راجع ..
يحمل رغيفٍ حار .. زاد لثلاث صغار..
للمدرسه صحيوا ولبسوا مرايلهم ..
سنين سنين .. هالصوت الجارح الزاجر..
يصيح بي وينك.. قطفت بساتينك ..
وابلك خذته القوم.. خذته القوم هالابل..
أفـّز وفي أنفي ..عـجاجة الغـاره ..
وأصحى وفي كفي ساعه ونظاره ..
مالي إبل أرجـوك مـالي نخيل .. لانصل ولا حـافر..
تعبت من صوت العروق المبطيه.. ومن صمتي الفاجر..
وأنا أخر الفرّيس ظنك ..
أنـا أخـر الفرّيـس ..
حسبك ياحادي العيس ..
هذا الزمن عاري ..لاردن ولا جوخه ..
يصهل مهر راكان ..
وينادي ابن مهيد ..
يوقف شعر هالبيد ..
هذا الزمن أصمخ .. مايسمع شيوخه..
شد الرحال .. سافر ..
دوّر ياحادي العيس .. روض وزهر ماديس
ولذنوبنا.. لذنوبنا غافر
وداع يا خضر العروق اللي على ظهر الكفوف المبطيه
يالماضي الحاضر




((المرايه ))
كلنا عشاق لكن ..
إنتي لا ما انتي معايا ..
لما تجمعنا الأماكن
تاخذك مني المرايا ..
انتي مشغوله بروحك
ما ملك عقلك وروحك
لا أنا.. ولا سوايا
اعطي ظهرك للمرايا .. وشوفي غيرك
اظهري من ليل كحلك ومن أساورك وحريرك
افتحي الشباك مره .. شوفي الناس والشوارع
وش كثر هالغربه مره .. للي وسط الزحمه ضايع
انتي مشغوله بروحك .. ما ملك عقلك وروحك
لا أنا.. ولا سوايا
كلنا عشاق لكن
كل واحد له حكايه ..
كلناعشاق لكن
كلنا نحبك.. نحبك
وأنتي جرحك في ساكن .. وأنا جرحي برا قلبك
أمشي لو نصف المسافة .. وقفي بينك وبيني
أكسري كل المرايا .. أنتي أجمل وسط عيني
يا للي مشغولة بروحك من خذا قلبك وروحك
هو أنا .. ولا سوايا
كلنا عشاق لكن
كل واحد له حكاية

[ملاك الحرية]

فقط للاعضاء المسجلين يمكنهم رؤية الروابط

[امة الله]

فقط للاعضاء المسجلين يمكنهم رؤية الروابط